Umbono womprofethi ngentambo yokulinganisa
1 Ngaphakamisa amehlo ami, ngabona umuntu ephethe intambo yokulinganisa. 2 Ngasengisithi kuye: Uya ngaphi na? Wathi kimi: Ngiyalinganisa iJerusalema, ngibone ukuba bungakanani ububanzi balo lobude balo. 3 Kwasekusiza isithunywa esasikhuluma lami, lesinye isithunywa sasihlangabeza. 4 Sona sathi: Gijima, utshele leyana insizwa uthi: IJerusalema lizakuba ngumuzi ongelamiduli ngenxa yobunengi babantu lenkomo ezikilo. 5 Ngoba mina ngizakuba ngumduli womlilo olizingelezeleyo, lolivikeleyo, kutsho iNkosi, ngibe yinkazimulo phakathi kwalo.
Abantu abathunjiweyo bayabizwa
6 Heyi! Balekani elizweni lasenyakatho, kutsho iNkosi; ngilihlakazele emazweni wonke njengemimoya yomine yaphezulu. 7 Heyi! Balekani, lina bantu baseZiyone abahlala eBabiloni.
8 Ngoba iNkosi yamabandla yangithuma ngenxa yodumo lwayo ezizweni ezaliphangayo, ngoba olithintayo uthinta igugu layo, yathi: 9 Ngizaziphakamisela isandla sami, zibe yimpango yalabo ababezikhonza. Ng’khona lizakwazi ukuthi iNkosi yamabandla ingithumile. 10 INkosi ithi: Hlabela ngokuthaba, wena Ziyone, ngoba khangela, ngiyeza, ngizahlala phakathi kwakho. 11 Izizwe ezinengi zizazihlanganisa leNkosi ngalolosuku, zibe ngabantu bayo. Izahlala phakathi kwakho, uzakwazi ukuba iNkosi yamabandla ingithumile kuwe. 12 INkosi izakuthatha uJuda, abe yisabelo sayo elizweni elingcwele, ibuye ikhethe iJerusalema futhi.
13 Thulani, bantu lonke, phambi kweNkosi, ngoba ivukile, yaphuma endaweni yayo engcwele.