1 Vula iminyango yakho, Lebanoni,
ukuba umlilo utshise imikusu yakho.
2 Khala wena phane, ngoba umkusu usuwile,
ngoba izihlahla ezinhle ziphundlekile.
Khalani lina zihlahla ezinkulu zaseBashani,
ngoba igusu elikhulu seliganyuliwe.
3 Ilizwi lokukhala kwabelusi liyezwakala,
ngoba udumo lwabo luchithekile.
Ukubhonga kwezilwane kuyezwakala
ngoba ihlathi laseJordani liqothulwe.
Abelusi ababili
4 INkosi uNkulunkulu wami yathi: Yalusa izimvu zokuhlatshwa. 5 Abazithengayo bayazihlaba, bengabi lacala; labazithengisayo bathi: Kayibongwe iNkosi, senginothile; abelusi bazo kabazihawukeli. 6 Ngoba kangisayikubahawukela abakhileyo kulelilizwe, kutsho iNkosi. Ngizabanikela abantu ezandleni zabomakhelwane babo, lezamakhosi abo; bazachitha ilizwe, kangiyikophula loyedwa ezandleni zabo.
7 Ngasengizalusa izimvu zokuhlatshwa yilabo abathenga izimvu. Ngathatha intonga ezimbili, enye ngayibiza ngokuthi nguMusa, lenye ngayibiza ngokuthi nguNhlanganiso. Ngazalusake izimvu. 8 Ngaxotsha abelusi abathathu ngenyanganye, ngoba basebengidinile, lami sengiyisinengiso kibo. 9 Ngakhoke ngasengisithi ezimvini: Kangisayikulalusa; efayo kayife, lelahlekayo kayilahleke; lalezo eziseleyo zidlane. 10 Ngasengithatha intonga yami ethiwa nguMusa, ngayaphula ukuba ngaphule isivumelwano seNkosi engangisenze labantu bonke. 11 Sephulwake ngalolosuku, labathengi bezimvu ababengikhangele bazi ukuba kwakuyilizwi leNkosi. 12 Ngasengisithi kibo: Uba kulungile kini, ngiphani iholo lami; kodwa uba kungalunganga, yekelani. Basebengilinganisela iholo lami amashekeli esiliva angamatshumi amathathu. 13 INkosi yasisithi kimi: Aphosele endaweni yokugcinela imali; yeka inani elinje ababengihlawule ngalo! Ngakhoke ngasengiwathatha amashekeli esiliva angamatshumi amathathu, ngawaphosela endaweni yokugcinela imali ethempelini. 14 Ngasengisaphula intonga yami yesibili ethiwa nguNhlanganiso ukuba kwaphuke ukuzalana kukaJuda loIsrayeli.
15 INkosi yasisithi kimi: Thatha futhi izikhali zomalusi oyisithutha. 16 Ngoba ngizabeka elizweni umalusi ongakhathaleli izimvu ezifayo, ongazidingiyo ezilahlekileyo, longazelaphiyo ezilimeleyo, longaziboneliyo eziphilayo, kodwa adle inyama yezinonileyo, adle lamangqina azo.
17 Maye kumalusi oyisithutha otshiya izimvu!
Kungathi umkhonto ungagwaza ingalo yakhe lelihlo lakhe lokunene.
Ingalo yakhe kayitshwabhane, lelihlo lokunene lifiphale.