Ukubusiswa kwalowo othethelelwe izono zakhe
1 Ubusisiwe lowo osiphambeko sakhe sithethelelwe,
osono sakhe sisitshekelwe.
2 Ubusisiwe umuntu iNkosi engambaleli ububi,
okungekho inkohliso emoyeni wakhe.

3 Lapho ngathula ukuvuma isono sami,
umzimba wami waguga ngenxa yokububula kwami usuku lonke.
4 Ngoba emini lasebusuku isandla sakho, Nkosi, sasinzima phezu kwami;
umzimba wami woma kungathi wonyiswa yikutshisa kwehlobo.

5 Ngasivuma isono sami kuwe,
kangisifihlanga isiphambeko sami,
ngathi: Ngizakuvuma iziphambeko zami eNkosini.
Wena wathethelela icala lesono sami.

6 Ngakhoke ilowo lalowo olungileyo kakhuleke kuwe
ngesikhathi sokuhlupheka.
Ekukhukhuleni kwezinhlupheko ezinengi
kaziyikufinyelela kuye.
7 Wena uyindawo yami yokucatsha,
uyangilondoloza ekuhluphekeni,
ungiphahle ngamahubo okukhululwa.

8 Ngizakukufundisa ngikutshengise indlela ozakuhamba ngayo,
ngizakweluleka, ilihlo lami libe phezu kwakho.
9 Ungabi njengebhiza loba imbongolo engelakuqedisisa,
enqandwa ngomkhala langamatomu,
ukuze ikulalele.

10 Zinengi izinhlupheko zomubi,
kodwa uthando olungapheliyo luyamkhusela lowo othemba eNkosini.
11 Jabulani eNkosini, lithabe, lina abalungileyo;
memezani, lithabe, lina lonke abaqotho enhliziyweni.