Ubupristi bukaKristu bukhulu kulalobo babaJuda
1 Isiqokoqela salokho esikutshoyo yilesi; silaye umpristi omkhulu onjalo osewahlala ngakwesokunene sesihlalo sobukhosi soMkhulu ezulwini, 2 isikhonzi endaweni engcwele lesethente eliqotho elamiswa yiNkosi kungesuye umuntu. 3 Yilowo lalowo umpristi omkhulu umiselwe ukunikela ngeminikelo lemihlatshelo; ngakhoke kuyadingeka ukuba laye lumpristi abe lakho okuthile kokunikela. 4 Ngoba uba ubesemhlabeni, ubengayikuba ngumpristi lakanye, ngoba bakhona abapristi abanikela umnikelo ngokomlayo. 5 Bakhonza endaweni engcwele engumfanekiso lesithunzi sokwasezulwini, njengoba uMose esezakwenza ithente walaywa ngokuthi: Qaphelisa ukuthi ukwenza konke ngesifanekiso owaboniswa sona entabeni. 6 Kodwa uKristu unikiwe inkonzo enhle kakhulu ukwedlula endala, njengalokhu engumlamuli wesivumelwano esingcono esimisiweyo ngezithembiso ezingcono. 7 Ngoba uba lesosivumelwano sokuqala besingasoleki, bekungayikufunwa indawo yesesibili. 8 Kodwa lapho ebasola, uthi kibo:
Insuku ziyeza, kutsho iNkosi, lapho ngizakwenza isivumelwano esitsha lendlu kaIsrayeli lendlu kaJuda,
9 esingenjengesivumelwano engasenza labokhokho babo
mhla ngibabamba ngesandla ukubakhupha elizweni laseGibithe,
ngoba kabahlalanga esivumelwaneni sami,
lami kangibananzanga, itsho iNkosi.
10 Yilesi isivumelwano engizakusenza lendlu kaIsrayeli emva kwalezonsuku, itsho iNkosi;
ngizakufaka imilayo yami engqondweni zabo,
ngiyilobe enhliziyweni zabo,
ngibe nguNkulunkulu wabo,
bona babe ngabantu bami.
11 Kabasayikufundisana kube yilowo lalowo lowakibo,
loba ilowo lalowo lomfowabo, ngokuthi: Yazi iNkosi.
Ngoba bonke bazakungazi, kusukela komncinyane wabo kuze kufike komkhulu.
12 Ngizakuba lesihawu ngokungalungi kwabo,
lezono zabo kangisayikuzikhumbula.
13 Ngokukhuluma ngesivumelwano esitsha wenza esokuqala sibe ngesigugileyo; osekugugile sekukudala sekuzakunyamalala.