UElija uthuma uObadiya kuAhabi
1 Ngemva kwensuku ezinengi ilizwi leNkosi lafika kuElija ngomnyaka wesithathu lathi: Hamba uyeziveza kuAhabi, sengizanisa izulu emhlabeni. 2 UElija wasesiya ukuziveza kuAhabi. Indlala yayinkulu eSamariya. 3 UAhabi wabiza uObadiya owayegcina isigodlo — UObadiya wayeyesaba kakhulu iNkosi uNkulunkulu; 4 kwathi lapho uJezebeli ebulala abaprofethi beNkosi, uObadiya wathatha abaprofethi abalikhulu, wabafihla ngamatshumi amahlanu obhalwini, wabanika ukudla lamanzi — 5 UAhabi wathi kuObadiya: Akuhambe phakathi kwalo lonke ilizwe kuyo yonke imithombo yamanzi lasezihotsheni zonke; mhlawumbe singazuza utshani, sisize amabhiza lezimbongolo ukuze zingafi, singalahlekelwa ngezinye izifuyo. 6 Basebesahlukaniselana ilizwe ekulihloleni kwabo; uAhabi waqonda kwenye indawo eyedwa, uObadiya laye waqonda kwenye eyedwa.
7 Kwathi uObadiya esahamba wahlangana loElija; uObadiya wamazi, wathi mbo ngobuso phansi wathi: Nguwe yini, Elija, nkosi yami na? 8 Yena wamphendula wathi: Yebo, yimi. Hamba uyetshela inkosi yakho uAhabi ukuthi uElija ulapha. 9 UObadiya wathi: Ngone ngani ukuba unikele inceku yakho esandleni sikaAhabi ukuba angibulale na? 10 Ngifunga iNkosi uNkulunkulu wakho kakulasizwe lombuso inkosi yami engathumelanga kukho ukukudinga wena; kuthi lapho besithi: Kakho lapha; awufungise lowombuso lalesosizwe ukuba kabakwazi lapho ukhona. 11 Wenake uthi kimi: Hamba uyetshela inkosi yakho ukuthi uElija ulapha. 12 Kuzakuthi ngisand’ ukusuka kuwe, umoya kaNkulunkulu ukuthwale ukuse lapho ngingazi khona, kuthi lapho sengimtshelile uAhabi engasakufumani, angibulale lanxa mina engiyinceku yakho ngiyikhonza iNkosi uNkulunkulu kusukela ebutsheni bami. 13 Kawutshelwanga yini lokho engakwenzayo lapho uJezebeli ebulala abaprofethi beNkosi uNkulunkulu, ukuthi ngafihla abaprofethi bayo abalikhulu ngamatshumi amahlanu obhalwini, ngabanika ukudla lamanzi na? 14 Wenake uthi: Hamba uyetshela inkosi yakho ukuthi uElija ulapha. Yena uzangibulala. 15 UElija wathi: Ngifunga iNkosi yamabandla engiyinceku yayo, ukuthi ngizaziveza kuAhabi lamuhla. 16 UObadiya wasehambake ukuhlangabeza uAhabi, wamtshela; uAhabi wasuka ukuhlangabeza uElija.
17 Kwathi uAhabi embona uElija wathi kuye: Kunguwe yini, wena mhluphi kaIsrayeli na? 18 Yena waphendula wathi: Kangimhluphanga uIsrayeli mina. Kodwa wena kanye lendlu kayihlo limhluphile, ngoba litshiyile imilayo yeNkosi, lalandela uBali. 19 Ngakhoke thumela ilizwi, ubuthanise wonke uIsrayeli entabeni iKarmeli, labaprofethi bakaBali abangamakhulu amane lamatshumi amahlanu labaprofethi bakankulunkulukazi uAshera abangamakhulu amane abadlayo etafuleni kaJezebeli.
UElija labaprofethi bakaBali eKarmeli
20 Ngakho uAhabi wasethumela ilizwi kubo bonke abakoIsrayeli, wabuthanisa abaprofethi entabeni iKarmeli. 21 UElija wasondela ebantwini bonke wathi: Koze kube nini lithikaza na? Uba iNkosi inguNkulunkulu, landelani yona; kodwa uba kunguBali, mlandeleni. Abantu kabamphendulanga langelilodwa ilizwi. 22 UElija wasesithi ebantwini: Sekuyimi ngedwa umprofethi weNkosi uNkulunkulu oseleyo; kodwa abaprofethi bakaBali bangamakhulu amane lamatshumi amahlanu. 23 Sinikeni inkunzi ezimbili, bazikhethele bona enye inkunzi, bayihlahlele iziqa, bazibeke phezu kwenkuni, bangaphembi mlilo; lami ngizahlahlela enye, ngiyibeke phezu kwenkuni, ngingaphembi mlilo. 24 Likhuleke ebizweni likankulunkulu wenu, lami ngizakhuleka ebizweni leNkosi; unkulunkulu ozaphendula ngomlilo nguye uNkulunkulu. Bonke abantu baphendula bathi: Kulungile lokhu. 25 UElija wasesithi kubaprofethi bakaBali: Zikhetheleni lina enye inkunzi, liyilungise kuqala ngoba lina libanengi; beselikhuleka ebizweni likankulunkulu wenu, kodwa lingaphembi mlilo. 26 Bayithathake inkunzi abasebeyinikiwe, bayilungisa, bakhuleka ebizweni likaBali kusukela ekuseni kwaze kwaba semini, besithi: Bali, akusiphendule! Kodwa kakubanga lalizwi, kakubanga lampendulo. Bagidagida bebhoda ialtare abalakhileyo. 27 Kwathi emini uElija wadlala ngabo esithi: Memezani kakhulu, ngoba ungunkulunkulu; mhlawumbe uyanakana, loba ubambekile, ingabe usekuhambeni, kumbe ulele, kudingeka ukuba avuswe. 28 Bamemeza kakhulu, bazisika ngemihedla langemidikadika njengokwejwayela kwabo baze bopha igazi. 29 Imini yonke baklabalala kwaze kwaba yisikhathi sokunikelwa umnikelo; kodwa kwakungezwakali lizwi, kungaphenduli muntu, kungalaleli muntu.
30 UElija wasesithi ebantwini bonke: Sondelani kimi. Bonke abantu basondela. Waselungisa ialtare leNkosi elaselidilikile. 31 Wathatha amatshe alitshumi lambili, alingana ubunengi bezizwe zamadodana kaJakobe okwafika kuye ilizwi leNkosi lisithi: Ibizo lakho lizakuba nguIsrayeli.
32 Ngalawomatshe wakha ialtare ebizweni leNkosi. Wemba umgelo ozingelezela ialtare, okungangena kuwo igokoko lenhlanyelo. 33 Waselungisa inkuni, wayihlahlela iziqa inkunzi, wazibeka phezu kwenkuni, wasesithi: Gcwalisani imbiza ezine ngamanzi, liwathele phezu komnikelo laphezu kwenkuni. 34 Wathi: Phindani futhi. Basebephinda. Wathi: Phindani okwesithathu. Basebephinda okwesithathu. 35 Amanzi ageleza, azingelezela ialtare, agcwalisa lomgelo. 36 Kwathi ngesikhathi sokunikelwa komnikelo uElija wasondela wathi: Nkosi, Nkulunkulu kaAbrahama lokaIsaka lokaIsrayeli, kakwaziwe lamhla ukuthi nguwe onguNkulunkulu koIsrayeli; lokuthi mina ngiyinceku yakho, lokuthi ngizenzile zonke lezizinto ngokutsho kwakho. 37 Ake ungiphendule, Nkosi, ungiphendule ukuba lababantu bazi ukuthi wena Nkosi unguNkulunkulu, lokuthi uziphendulele kuwe inhliziyo zabo. 38 Wasusehla umlilo kaNkulunkulu, watshisa umnikelo wokutshiswa lenkunzi lamatshe lenhlabathi, waqeda lamanzi asemgelweni. 39 Kwathi abantu bonke bekubona lokhu bathi mbo ngobuso phansi, bathi: INkosi yiyo enguNkulunkulu; iNkosi yiyo enguNkulunkulu. 40 UElija wasesithi kibo: Babambeni abaprofethi bakaBali, kungaphunyuki loyedwa wabo. Basebebabamba. UElija wabehlisela esifuleni iKishoni, wababulalela khona.
Ukuphela kwendlala
41 UElija wasesithi kuAhabi: Buyela, uyekudla unathe, ngoba izulu selihuba. 42 Wasebuyelake uAhabi ukuba ayekudla anathe. UElija wakhwela engqongeni yentaba iKarmeli; wakhothamela phansi emhlabathini, wafaka ikhanda lakhe phakathi kwamadolo.
43 Wathi encekwini yakhe: Akuhambe, ukhangele ngasolwandle. Yahambake, yakhangela, yathi: Kakulalutho. UElija wathi: Hamba futhi uphinde kasikhombisa. 44 Ngesikhathi sesikhombisa yathi: Ngibone iyezana elingangesandla somuntu liphuma olwandle. Wathi: Hamba uyetshela uAhabi ukuba abophele inqola yakhe yokulwa, ahambe, funa izulu limvalele. 45 Kwathi ngemva kwesikhatshana kwaba mnyama phezulu ngamayezi, umoya wavunguza, kwana izulu elikhulu. UAhabi wakhwela inqola yakhe, waya eJezereli. 46 Amandla eNkosi uNkulunkulu ehlela kuElija; wakhwica ingubo yakhe, wagijima phambi kukaAhabi, waze wafika esangweni laseJezereli.
© Bible Society of Zimbabwe 1978